施永青背后字画由一位本港已故赵姓书法家送赠。当时故友称想送他字画，想起屈原《渔父》，但一般人较常听到「举世皆浊我独清」，其实词中交代渔父曾劝屈原：「沧浪之水清兮，可以濯吾缨；沧浪之水浊兮，可以濯吾足。」即是江水乾淨时可以洗头，江水污糟时用来洗脚，不用经常众人皆浊。这是自嘲，即是维港那麽肮髒，应该一早跳海，解释「我点解唔去死」。他本身想写「不拜满天神佛，何惧遍地妖魔」，但该名书法家认为不好，「话我招唔招积得滞，所以为我好无写，我都觉得过火咗啲嘅。」

约施永青访问，起初他是拒绝，他whatsapp回覆：「我已决定淡出，不再这么高调地自以为是了。」事实上去年底他已表达退隐的意向，儿子施俊嵘今年1月1日接任中原集团副主席，正式交棒。最终他选择在七十大寿前接受这次访问，因为题目叫「无为而治」，这套在廿多年他从厕板上悟出来的管理之道，令中原地产由十多间分行变成今日在中港两地拥2,500间分行5.5万员工的集团。

他说，无为而治当初只是与合作伙伴管理上完全相反的做法，其后将道家及西方自组织理论混合。一个相信一己之言可以改变世人价值观的施老闆，今天来到从心所欲之年，明知「中原，终有一日会完」，希望无为而治的哲学植入世人的脑海。

施永青与王文彦于1978年创立中原地产，初期由王文彦掌政，施永青说那时以严密管理系统管治地产代理，但看见这种有为的管理方式，公司不易壮大，每隔一段时间就有大规模的管理人员流失，造成大量内部虚耗。

1990年代初期改由他掌政后，当时公司管理层就为女同事着裙或着裤而争拗，明明经纪口水用于开单，却为此荒谬事情浪费。有一次他去厕所阅读《道德经》，「我坐在厕板上竟忽然开窍」，于是借此经实施一种与王文彦完全相反的管理称「无为而治」。

「最初只喺我同合作伙伴管理上嘅分歧，即係佢有目标、部署、计划，每个步骤都要求达到一定效果，要下底全面执行佢嘅方案。我就相信有时下底啲人会叻过我嘅，咁佢哋想用一啲我最初谂住未必好嘅方法去做，我都畀佢试下。事实证明有时佢哋真喺叻过我，好过淨係我去做吖嘛！按照我去做，衰咗我要孭飞！按照佢去做，衰咗佢孭飞！咁梗係搵人揹飞好过自己孭晒囉！」

这套管理可用八字真言概括：「上面无为，下面有为」，「即喺话如果上面无为啲，下低想发围嘅人就有多啲空间。我唔够胆话无为而治下嘅机构比有为嘅强，但喺一间无为而治嘅公司入面做嘢会开心过喺一间老闆好有为嘅公司入面做嘢。我喜欢无为老闆下工作，而家我做老闆咪选择无为，等下低啲人开心吓。」

无为而治不能简单说是下放权力，「实际我将一啲道家思维和西方自组织学说混合。」他认为，公司本质是有机生命体，因应外围环境和内部力量不断演变成为一个更有适应能力和延续能力的体系。他深信这个世界是无心插柳柳成荫，有次挪威旅行看见峡谷两崖岩石长满树，「点会有人岩石播种，都喺风吹咗粒种子，啱啱有啲水，发咗芽，整吓整吓长咗出来，畀你拣都唔会喺岩石上种树啦！自然界就喺咁，即老子话道法自然。我都係观察世界发觉世事万物係咁演变出嚟，咁咪觉得公司都应该咁演变！」

「无为而治其实即係『天行健，君子以自强不息』。点解可以无为？因为天道在运行，人为咗自己嘅存在意义、存在价值，当然要有啲作为，所以个人会自强不息。亦因为我信公司入面员工会自强不息，会追求自己嘅幸福，咁先可以无为喎！如果无个人嘅有为，管理上就唔可以无为，因为你喺建基于大部份人都想自强不息。」甚么时候该有为？「你一个人创业，你无为咁边个做。前线要有为过上面，细公司要有为过大公司。」

在中原地产工作的朋友说，施老闆有「三不原则」，包括不蚀钱、不输行家、不反艇。不是说上面无为吗？施永青回应：「唔係我定㗎，所有商业机构都唔可以蚀钱㗎啦！第二，你同行家竞争，唔可以输比行家，输比行家就将来淘汰出局囉！另外，我哋呢行喺人嘅行业，已无要求服众，只係唔反艇咋嘛！佢低低哋躀一铺，忍住先，都算数啦！平时睇你唔顺眼，不过我喺呢度仲搵到食，咪唔反你艇住囉！」

读过20世纪哲学家Karl Popper的施永青相信这个世界只能知道甚么是错，不可以知道甚么一定是对，现在觉得对的，将来会被否定。相信这套，他亦就早已察觉到无为而治下的中原（中国）面对严峻的考验，他坦言：「无为而治喺内地都work过一个时期，但係出咗啲好有为嘅竞争对手。短期而言，有为出到嚟嘅效果可能比无为强啲，所以最近呢几年喺内地都处于捱打嘅局面。」他口中的有为竞争对手就是链家，过去多年他多次提及这个劲敌，数年前中原地产重启上市计划正为此而来，惟最终与王文彦谈不合拢，上市计划搁置。

不过他表现得豁达地说：「中原（中国）经营方法叫『森林式发展』，每个城市有一棵具有无为而治基因嘅树，需要适合当地气候和土壤。而家遇到强敌，中原地产喺大陆有北京种、上海种、深圳种，有啲强种有啲弱种，弱种就淘汰㗎啦！希望有啲死剩种囉。死剩种如果再演变繁殖，睇吓将来有无机会开枝散叶。原有啲种唔够人劲㗎，老老实实会有啲被淘汰。（惊唔惊死剩种都死埋？）咁呢个世界死剩种都会死埋㗎喎！有无听过我讲，中原中原，终有一日会完，呢个係世界嘅必然规律。你一出世，命运就係死路一条。一个机构都会死，死得快定死得慢就睇佢自己一番修为。佢哋唔想死就努力㗎啦，如果种唔好，基因演变失误，咪坚持唔到。逼到埋牙，前线变得有为过以前，生命受威胁，佢都会撑多两脚。」

那么插手拯救中原（中国）是否有违无为而治？「我唔会由得佢，都想呢个有份创造嘅生命体可以延续。遇到问题，有啲人设想好多方法做得更好，呢啲相对有为。无为做法係头痛医头、脚痛医脚，遇到问题去解决。有人选择多做伟事，我尽量避免犯错。一个人犯少两个错，已经唔错！」

西方有一套管理称防错系统，设计工作分工和流程，然后监督其运行，施永青认为：「防错系统是一个无进步系统，将以前经验定落后一路咁做，但出嚟嗰样嘢会因为时间和环境改变，唔行得！大部份大公司走向衰落就係因为搵到一套唔错嘅系统一路咁行，最后咪out咗囉！但如果唔定呢，反而会适应新情况，学习不断地试错。你唔畀间公司犯错，间公司就无进步！」

然而作出最愚蠢决定的人往往是老闆，「你睇报纸发现，哗！咁嘅嘢边个谂？梗係佢老闆。如果唔係佢老闆，公司入面一早好多人反对。即係越错越戆居嘅嘢都係老闆谂出嚟。除咗老闆，无人会咁蠢。而家我都认为老闆先至会做出最蠢嘅事。我无为咪做少啲囉，尽量少做咪后悔少啲囉！（咁你做过最后悔係咩事？）对于过去嘅事都改变唔到，有咩好后悔呢！」

本月七十大寿后，施永青决定淡出，「呢行做咗40年，大概仲有十零廿年活，无问题啩！仲有咩可以做吓呢。瓣嘢做得太耐咪想做下其他嘢囉！我唔想地产方面太多，当然唔会啪掣咁，一啪停咗。无为而治嘅人係随缘，等上天安排，就到就就，唔使某时某日即刻变晒，变脸咩！」

他已安排儿子施俊嵘负责中原集团，女儿施慧勤负责子公司业务，如利嘉阁，「过咗生日，啲人问我，我就会话你问吓施俊嵘啦！佢决定到咪佢决定囉！而家问我，我照答，迟下问我，我会耍下佢先，耍得甩就耍。如果有人话：『哗！施生，你个仔好恶啃喎，咁样决定都得嘅，你帮手睇睇啦！』我会话，好啊，睇睇啦！」